"မေတ္တာ"

 

အလိုလိုကြွေကျလာဖို့
တံချူဘေးထားပြီး
မျှော်လင့်နေတတ်သူဟာ
ပန်းကလေးအကျနာသွားမလား
ပူပန်မှုများစွာ...။

  

စကားဝှက်လဲသိတယ်

မြေပုံလဲရှိတယ်

သူ့အလိုလို

တံခါးတွေပွင့်ဖို့

ရပ်စောင့်နေမိသူပါ....။

 

တံခါးလေးပွင့်ဟလာသလို

ပန်းကလေးလှုပ်ခတ်သွားသလို

ထင်ယောင်မြင်ယောင်ရင်း

ယုံကြည်ချက်

လေပေါင်ဖြည့်ရ....။

 

ပန်းကလေးရေ

တံခါးလေးရေ

လမ်းကလေးရေ....။

 

အလိုမတူပဲ

ဆံချည်တမျှင်တောင်

မပိုင်လိုခဲ့ပါဘူး.....။

 

မနက်ခင်းတိုင်းကို

ပန်းကလေးခုန်ဆင်းလာမလား

Jazz တေးသွားနဲ့နိုးထ....။

 

ပြီးတော့

ပန်းအိုးလှလှလေးတခုမရှိကြောင်း

ငိုချင်းနဲ့ အိပ်ယာဝင်တယ်....။

 

မျှော်လင့်ချက်အကူနဲ့

အသက်လုနေရ

မနက်ဖြန်များပါပဲ...။

 

ငါးမျှားခြင်း

 

ငါးမျှားတယ်ဆိုတာ..
 ကိုယ့်အတွက်ကတော့

ငါးရဖို့ဆိုတာထက်

လှေလေးတစ်စင်းနဲ့

လူသူကင်းမဲ့တဲ့ ရေကန်ထဲမှာ

အတွေးနယ်ချဲ့ခြင်းပါပဲ။

 

ကိုယ်က ငါးလည်း မယ်မယ်ရရ မမျှားဖူးသလို

ဘဝမှာ ငါးတစ်ကောင်မှလည်း မရဖူးပါဘူး။

 

 

 

ငါးရခဲ့ရင်လည်း အဲဒီငါးကို အိမ်ကိုဘယ်လို

သယ်သွားရမလဲဆိုတာ

သိသူလည်း မဟုတ်လို့

ငါးမျှားရင်းနဲ့ ငါး မရပါစေနဲ့....လို့

ဆုတောင်း နေတတ်သူ လူတစ်ယောက်ဆိုရင်လည်း မမှားဘူးပေါ့။

ညနေခင်းနေဝင်ရီတရော

ငှက်တွေ အိပ်တန်းပျံချိန်မျိုးမှာ

ငါးမျှားသူ တစ်ယောက်ယောက်က

ငါးမျှားတံကြိုးကို

ရေထဲ အဝေးကြီး လွှဲလို့ ပစ်လိုက်တဲ့ ပုံစံကတော့

တော်တော်လှတဲ့

က ကွက်လေး တစ်ခုလိုပါပဲ။

အဲလိုရှုခင်းကို မြင် နေရတာကိုက

ဘဲလေး ကချေသည် တစ်ဦးကို

ငေးကြည့်နေ ရသလိုပါပဲ။

 

"စီးချင်း"

ကံကြမ္မာကတော့ 

နှစ်ယောက်လုံးကို အလဲထိုးတာပါပဲ
ချစ်ခြင်းမေတ္တာကို ရှုသွင်းပြီး

ရှင်သန်ခြင်းကို ပြန်ထုတ်နေရတယ်

မခွဲနိုင်မခွာရက် လက်ကျန်ကာလများ...

နှစ်ယောက်လုံး ချိန်းဆိုထားပြီးမှ

အဆက်အစပ်မရှိတဲ့ ဇာတ်ညွှန်းများ

ခင်ဗျားသဘောကျတတ်တဲ့ 

ပေါ့ပေါ့ပါးပါးဟာသ ဆိုပါတော့

နည်းနည်းတော့များတယ် ကိုယ့်ဆရာ

ပျော်ရဲ့မဟုတ်လား.....

လက်ဖဝါးနှစ်ဖက်ဖျတ်ကနဲ ရိုက်လိုက်တုန်းက 

အဆိပ်ကသပ်သပ် ပန်းကသပ်သပ် 

ဖြစ်ခဲ့ကြပြီးမဟုတ်လား အချစ်ရဲ့

စိတ်ကူးနဲ့လှမ်းမျှော်ကြည့်တိုင်း 

မင်းခေါင်းပေါ်က ပန်းလေးက လှတယ်

ဇာတ်လမ်းက ကြေကွဲစရာဆိုပေမဲ့ 

အရာတိုင်းက ခမ်းနားခဲ့ပါတယ်

တယောက်က ပျော်ရွှင်ဖွယ်ဇာတ်ဝင်တေးတွေဆိုမယ်

တယောက်က ခပ်ဝေးဝေးက လက်ခုပ်တီးမယ်

တစ်ကိုယ်စာလမ်းကလေး..

ငါ့အနမ်းနဲ့ မှော်သွင်းထားတဲ့ 

မင်းခြေဖဝါးတွေနဲ့

နှစ်ယောက်အတွက်စီးဆင်းခဲ့တယ်

စစ်ပွဲဆိုတာ တယောက်ထဲ ကျန်ခဲ့ရင်လည်း

အနိုင်ရတာပဲမဟုတ်လား ... အချစ်ရယ်...

'GMR'