Sunday, July 8, 2018
သိုသိပ်နက်နဲစွာ
ကျွန်တော်.....
သူမကို ချစ်မိနေတယ် ထင်တယ်။
ချစ်မိနေတယ်....
ချစ်မိသွားတယ်....
ချစ်တယ်.. ဆိုတဲ့ စကားလုံးတွေကို ချစ်ခဲ့မိတဲ့ မိန်းကလေးအချို့ကို ပြောဖူးပါတယ်။
ဒါပေမဲ့....
သူမနဲ့ပတ်သက်လာတဲ့အခါမှာတော့ ချစ်တယ် ဆိုတဲ့ စကားလုံးဟာ ပေါ့ရွှတ်ရွှတ် စကားလုံးတစ်လုံး ဖြစ်သွားရသလိုပဲ။ ချစ်တယ်ဆိုတဲ့ စကားထက် လေးနက်တဲ့ စကားလုံး သူမအတွက် ရှိကိုရှိရမယ်လို့ တွေးနေမိတာလည်း အခါခါ။
လက်ဘက်ရည်ကို အသာငုံ့သောက်ပြီး ပန်းကန်လုံးလေးကို စားပွဲပေါ်ကို တင်လိုက်ပြီး ခပ်လှမ်းလှမ်းက လမ်းသွယ်ကွေ့လေးကို မျှော်ငေးကြည့်လိုက်မိတယ်။ သူမ လျှောက်လာတော့မယ်ဆိုတာကို တွေးနေမိချိန်လေးမှာတင် နွေးကနဲဖြစ်သွားတတ်တဲ့ ရင်ဘတ်ကြီးကို သဘောကျရမှာလား၊ စိတ်တိုရမလား မပြောတတ်တော့ဘူး။ ဘေးမှာထိုင်ပြီး အကြော်စားနေတဲ့ မျိုးလွင်ကို အားနာစွာ မလုံမလဲ တစ်ချက် လှမ်းကြည့်လိုက်မိသေးတယ်။
တကယ်ဆို...
သူငယ်ချင်းက သူမကို ချစ်နေမိပြီလို့ အရင်ဖွင့်ပြောလာသူ မဟုတ်ပါလား။
စည်းဆိုတာ သူငယ်ချင်းအချင်းချင်းကြားမှာတောင် ထားရမယ့် အရာလို့ ခံယူထားတတ်သူတွေအတွက် အရာရာဟာ တပန်းရှုံးတာပဲ။
"ငါ..ဖြူနွေးကို အရမ်းချစ်နေမိပြီကွာ..."
အဲဒီနေ့က တိမ်တွေပြိုကျသွားသလိုခံစားလိုက်ရတယ်။ ဆေးလိပ်ငွေ့တွေကို မှုတ်ထုတ်လိုက်ပြီး ဘာမှမဖြစ်သလို မျက်နှာကို တည်ထားခဲ့ပေမဲ့ ရင်တစ်ခုလုံးဟာ လျှပ်စစ်တွေ ဖြတ်စီးသွားသလား ထင်လိုက်ရတယ်။
"အင်း........"
ဘာပြန်ပြောရမှန်းမသိလို့ မျိုးလွင်ရဲ့စကားကို "အင်း..." တစ်လုံးသာ လေးတွဲ့တွဲ့ ချပြီး တုံ့ပြန်ခဲ့မိတယ်။
အဲဒီညက ယောင်္ကျားတန်မဲ့ မျက်ရည်တွေကျလာလို့ ငုတ်တုပ်ထထိုင်ပြီး မယုံနိုင်စွာ ကိုယ့်ပါးကို ပွတ်ကြည့်မိသေးတယ်။ ငိုနေတာမဟုတ်ပေမဲ့ လက်ခုံမှာ မျက်ရည်စတွေနဲ့ဗျ....။ ကိုယ့်ကိုကိုယ် ခါးသက်စွာ ရယ်မောပစ်မိသေးတယ်။
Subscribe to:
Posts (Atom)