"ခင်ဗျား ကဗျာမစပ်ပါနဲ့" တဲ့လား
ကျမရဲ့ ကဗျာတွေက
မျက်နှာ စာမျက်နှာတွေပေါ်က
ရန်ပွဲတွေလောက်
ဆွဲဆောင်မှု မကောင်းလို့လား အချစ်ရဲ့
ပုပ်သိုးနေတဲ့ ရှဥ့်တစ်ကောင်လောက်တောင်
ဘဝကူး မကောင်းဘူးလို့
နက်ပြာရောင်ဘယ်ရီသီးတွေပေကျံနေတဲ့
ယုန်ပေါက်လေးတစ်ကောင်
ရယ်မောသံကို ကြားမိရဲ့ မဟုတ်လား။
တိမ်တွေလည်း ပြိုကုန်ပြီ
ပန်းတွေလည်း ခေါင်းမထူနိုင်တော့ဘူး
မိုးပေါက်တွေကြောင့်
ဇကာပေါက်ဖြစ်ကုန်တဲ့ ကန်ရေပြင်မှာ
လယ်ဗျိုင်းတစ်ကောင်
မစင်စွန့်ဖို့ အပြင်းအထန် ကြိုးစားနေတာကော
မြင်မိကြပါရဲ့လား။
